真是相處容易相愛難><

你都冇講到佢有o的乜o野可以同你「異性相吸」，我當冇咖喇～
其實呢，如果係o敢，個「就算我愛你」o既事態本身就已經冇乜「可能」發生咖喇……
真係兩個人好多地方都相似，我o地有時會扮晒係「認同」對方o敢，實際上借o的意再次肯定返自己o既行為、想法、身分同價值返轉頭——o敢樣就會「愛上」對方o既咧咩？
乜「同性」真係會「相吸」o既咩？
如果係o敢，「同『性』」都相吸啦！大家男人唔講其他，淨係生理結構、男人嗜好呀，都相似o的先啦！
社會又話「同性戀」係性少數，甚至係性變態？唔個個走去「同性相吸」？

我不嬲都係「異性相吸」o既「需求互補假說」o既堅定擁護者o黎咖嘞。原因好簡單，「相似論」用o黎解釋愛情從一開始就離題萬丈，講到愛情同「物以類聚」、「非我族類其心必異」o既社群內部凝聚力好似完全冇分別o敢，完全捕捉唔到情侶關係o係人際關係當中o既獨特性，太過愚蠢，頂佢唔順……
點解我o地要捃個人返o黎「愛」佢，要同佢「一齊」，要同佢組成一個叫做「情侶」甚至「夫婦」o既單位o者？

互通有無，各取所需o者嘛！
如果我要捃o既係同我一樣o既身體、同我一樣o既性格、同我一樣o既想法、同我一樣o既選擇……我自己未有齊o西囉？！
仲使乜咁辛苦捃個人返o黎「相愛」呀？

「相似論」解釋到兩個人開始溝通、相處o既一o的基礎，但係「需求互補假說」先至真係講緊「愛情」呀！
乜o野叫「基礎」呢？就係o敢o既，兩個人首先要有社群身分上有一o的相似之處，先有得開始接觸同溝通o既！一個中國人同一個非洲人要溝通呀，都要同時大家都識得某一種語言——例如英語（大家都有某一種語言「言說社群成員」o既身分）——先得咖？就算兩個都係中國人呀，如果兩個人o係階級上差太遠的話，從一開始就連「一見鍾情」o既機會都未必有啦！

「相似」係「（開始）相處」而唔係「相愛」o既基礎！
o拿，之所以有o的人呢，求求其其捃個同自己相似o既人拍拖，之後又好難長久呢……就係因為佢o地之間o既差異唔夠大，從來都冇互相吸引到過，一旦脫離寂寞o既壓力狀態唔使要水泡o勒，清醒返未知道自己唔愛對方囉……未因為從來未相愛過而分開囉……

你有o既男性身體器官，我全部都有，你憑乜o野吸引我呀？
你又敏感易發脾氣，我又敏感易發脾氣，你一發我又發，我發脾氣你又發再大o的脾氣o敢樣連鎖反應，除非兩個人其他地方好唔似，好互相吸引到，好唔捨得對方，好控制到火候啦，如果唔係我o地點樣拍施、相愛o者？ImpossiBELLE！
如果係普通o既社群關係呢，o敢又唔同喎，我o地隨時可以將仇恨轉移向社群外o既o個o的個體或群體（外國、社群假想敵），大家同仇敵愾，關係會愈o黎愈好添！

情侶關係o係諸多人際關係當中o既獨特性呢，就在於自成體系，就在於融為一體互通有無！

好似送禮物o敢，你話你送份禮物畀人，係送份你自己揀出o黎、你自己想送畀對方有心思有心意o係入面o既禮物o丫，定係好似好醒估中人表面上o既「心意」o敢送「o岩」份人o地以為自己想收到o既禮物先？

其實睇你同佢乜o野關係囉！

你同佢係感情深厚的話，送禮物係送心意咖嘛，你對佢o既心意係乜，未送乜畀佢囉！
如果你愛佢，你當然會想佢開心，佢o既感受會係o係你送禮物畀佢或者為佢做其他事o既時候o既一樣一定要考慮o既o野，非常之重要，但係呢，未必時時都係唯一要考慮o既o野。
你愛佢，有時候你未必係話想支配佢定係點，你只係想將自己o既知識同想法貢獻出o黎，去豐富佢o既人生！
譬如我好中意食麥當勞，冇女朋友o既時候我可能會餐餐都o係大河道或者沙咀道或者綠楊坊搞掂，但係呢，女朋友見到我o敢樣會捉我去食下其他o野……有時候其他明明貴好多o既o野食，對我o黎講，可能連最元祖o既麥記漢堡包都不如，我會唔開心，我會覺得佢冇照顧我感受……但係我知道哩o的就叫做「關心」！
有時我扭計，佢勞氣，佢會口是心非o敢警告我：「日日煎煎炸炸，又成日聯發叉燒，你第日生 cancer 我唔會理你咖！」

如果你同佢係冇感情的話，送禮物為乜o者，o黎o黎去去未又係為o左博取好感，好去達成自己o既各種目的？
譬如，你o地兩個人之間係完全冇關係o既，佢死佢事，到佢老來生 cancer 時你一早已經唔知去o左邊o勒，你又純粹只係想呃下蝦條，又知佢中意食老麥喎，o敢未「目標為本」o敢餐餐請佢食薯條，直截了當o敢討佢歡心囉！

都係睇你懷住乜o野目的做事情o者！

講真，人根本天生就藏唔住秘密！
你把口可以長時間保持閉合，但係你假笑緊o既一塊面、你面上面一個個變粗緊o既毛孔、你十隻手指其實都係不停o敢洩露緊你o既一個二個秘密出去……
睇穿你、擢你，有幾難o者？我唔愛你，我唔識你，但係我完全可以掌握到o西你全部o既心事，然後就住你以為自己想要o的乜，操縱你！

o拿，為住自己自私o既目的，漠視對方o既實際需要同利益，未就係「情聖」，未就係「考慮人感受」（仲要係「淨係」考慮人「感受」唔考慮其他o野添），未就係「識得談戀愛」囉！
其實o敢樣o既做法，未又係「手羅」o左o係一般o既人際關係入面將對方當係契細佬o敢耍o既「操弄手段」，用o黎玩弄你眼前哩個掛名女友感情同肉體o既卑鄙手段？
係呀，你好叻知道o西人o地個心入面諗緊o的乜，你好似上帝o敢有隻 all-seeing eye，你可以看透人o地內心o敢樣操縱人o地對你產生虛幻o既所謂「好感」，可以耍手段當人o地係扯線公仔o敢，唔當人o地係人o敢控制！
o的鹹濕伯父未o敢樣呃o靚妹o個囉！
落完仔送個有叉用o既 LB 畀佢，下次再落過！
哩o的未係「歧視」，未係「不平等」，未唔係「愛情」囉！

「愛情」入面「體貼」同「親密」o敢梗係有咖啦，但絕對唔係o敢樣咁「別有用心」o既心態！
如果你將對方視為係同你處於平等地位，同你一樣o敢成熟、一樣o敢可以溝通、一樣o敢值得尊重o既「人」的話，就算有壓力有意見分歧，你o地o既相處都會係以平等對話作為主要組成部分o既。
對啟蒙運動以來深受影響o既大部分「現代人」o黎講，最理想o既就係：o係我同女朋友o既相處同溝通入面，佢因為我願意表達自己o既想法o既緣故，有機會知道我真係想得閒食下麥當勞——「間唔時去食下」係我同佢o係互相尊重o既前提下做出o既共同o既決定、共同o既選擇。

我本身自己一個人就可以去餐餐食老麥咖啦？點解我而家因為有個女朋友o係度阻頭阻勢，搞到要兜咁大個圈，又要溝通，又要達成共識o敢，先至可以「間唔時去食下」，我好似仲係咁開心o既？
因為而家哩個唔再只係我自己一個人o既身體，唔再只係我自己一個人o既性格，唔再只係我自己一個人o既想法，唔再只係我自己一個人o既選擇！
哩個係我同佢共同o既決定、共同o既選擇！同佢o係一齊，我o既人生從此變得比起之前一個人o既時候，豐富得多，有意義得多！

我個人對「公義」、「尊重」同「平等o既愛情」都比較重視，從來都唔會利用我有而人o地冇o既知識同技巧對女朋友進行操弄……就算有壓力有意見分歧，我即使知道我講出o黎o既說話對方未必聽得入耳，但係我都唔會耍手段達成我各種o既目的，因為我尊重我o既伴侶，我好希望我o既伴侶同我o係埋一齊o既決定唔係我操弄o既結果，係佢自己真心實意做出o既決定，係o係我o地地位平等，互相了解同時進一步了解自己o既溝通入面一齊捃到出o黎o既共同o既真實心願。

（最理想梗係大家成日都好清醒o敢可以溝通啦，但係如果你想用少少旁門左道為o左你段婚姻或者感情好，都係o岩o既、好o既，做人o既o野，有時係要變通下咖嘛……）

講下講下搞到而家我自己都唔知自己有冇離題添……我頭先想講o既係：「愛情」o係人際關係當中有其獨特性，雙方要異性相吸，而且地位平等，等感情關係可以自成一個豐富、完整、平衡、穩定o既有運轉o既必要因而有活力o既系統！